Vakin er athygli á eftirfarandi ábendingum og athugasemdum en smávægilegum ábendingum var komið beint á framfæri við stjórnendur þegar endurskoðunarvinna fór fram.

1. Innra eftirlit
   Lagt er til að skráðar verði verklagsreglur um launavinnslu, tekjuskráningu, afstemmingar viðskiptamanna, bókhald og aðrar fjárreiður. Nauðsynlegt er að ábyrgðarsvið og heimildir séu skráðar m.t.t. aðgreiningar starfa
    
2. Viðskiptakröfur og uppgjör við skógarbændur
   Gerð er athugasemd við verklag vegna uppgjörs við skógarbændur í fjárhagsbókhaldi stofnunarinnar. Leiðrétta þarf stöðu í AR með tilliti til uppgjörs sem fært er í GL. Jafnframt þarf að breyta verklagi og finna lausn á því hvernig sölureikningar og uppgjör við skógarbændur eru færð í bókhaldi stofnunarinnar þannig að ekki myndist mismunur milli GL og AR.
    
3. Óuppgerðar stöður á gervikennitölu
   Gerð er athugasemd við óuppgerðar stöður í viðskiptamannabókhaldi stofnunarinnar, bæði kröfur og skuldir, sem færðar eru á gervikennitölum í fjárhagsbókhaldi stofnunarinnar. Um er að ræða stöður sem urðu til fyrir árið 2021 og færðar voru í eldra bókhaldskerfi Skógræktarinnar. Brýnt er að farið verði sem fyrst í þá vinnu að gera þessar kröfur og skuldir upp í bókhaldi Skógræktarinnar.
    
4. Viðskiptaskuldir og mismunur í AP
   Gerð er athugasemd við að mismunur er á milli stöðu viðskiptamanna-skulda í AP og GL. Gera þarf viðeigandi leiðréttingar milli kerfishluta.