Embættið

Staða og hlutverk

Ríkisendurskoðandi starfar á vegum Alþingis og er trúnaðarmaður þess, samkvæmt lögum nr. 46/2016 um ríkisendurskoðanda og endurskoðun ríkisreikninga. Hann er sjálfstæður og engum háður í störfum sínum. Skrifstofa ríkisendurskoðanda nefnist Ríkisendurskoðun.

Hlutverk embættisins er að hafa eftirlit með rekstri og fjármálum ríkisins, ganga úr skugga um að fjármunum sé ráðstafað á hagkvæman og réttmætan hátt og í samræmi við ákvarðanir Alþingis.

Sjálfstæði embættisins felst í því að þótt það heyri stjórnskipulega undir Alþingi þá velur það sjálft og skipuleggur verkefni sín. Ríkisendurskoðun er því í senn sjálfstæð gagnvart Alþingi og algerlega óháð framkvæmdarvaldinu. Að þessu leyti er staða Ríkisendurskoðunar svipuð og systurembætta hennar í nágrannalöndunum.

Hjá Ríkisendurskoðun starfa um 45 manns á tveimur starfsstöðvum. Aðalskrifstofa embættisins er í Bríetartúni 7 í Reykjavík en auk þess rekur embættið starfsstöð að Glerárgötu 34 Akureyri.

Brietartún 7, Reykjavík

Glerárgata 34, Akureyri

Ríkisendurskoðandi

Guðmundur Björgvin Helgason

Guðmundur Björgvin Helgason var kosinn ríkisendurskoðandi til sex ára af Alþingi hinn 9. júní 2022. Hann er fæddur árið 1964 og er með BA-próf í alþjóðasamskiptum frá George Washington University og MSc-próf í stjórnmálafræði frá London School of Economics. Hann var áður ráðuneytisstjóri í landbúnaðarráðuneyti og mannauðsstjóri hjá Flóttamannahjálp Sameinuðu þjóðanna í Jórdaníu.

Ferilsskrá ríkisendurskoðanda (pdf)
Hagsmunaskáning ríkisendurskoðanda (pdf)

Stefnumótun 2025-2029

Stefnumótun ríkisendurskoðanda fyrir tímabilið 2025-2029 tekur mið af því lögbundna hlutverki embættisins að vera trúnaðarmaður Alþingis og vera ábyrgur gagnvart því við endurskoðun og eftirlit með rekstri og fjármálum ríkisins. Ríkisendurskoðandi upplýsir Alþingi og stjórnvöld um málefni sem varða rekstur og fjárreiður ríkisins, leiðir í ljós frávik frá lögum og reglum á því sviði og gerir tillögur að úrbótum, bættri stjórnsýslu, skýrari ábyrgð og betri nýtingu ríkisfjár.

Ríkisendurskoðandi er sjálfstæður og engum háður í störfum sínum og ákveður sjálfur hvernig hann sinnir hlutverki sínu samkvæmt lögum nr. 46/2016 um ríkisendurskoðanda og endurskoðun ríkisreikninga.

Störf embættisins miða að því að veita framkvæmdarvaldinu aðhald og löggjafarvaldinu traustar og áreiðanlegar upplýsingar um fjárreiður ríkisins og ríkisaðila, sem og frammistöðu þeirra. Þannig metur Ríkisendurskoðun og miðlar til Alþingis og almennings upplýsingum um meðferð og nýtingu ríkisfjár, hvort hagkvæmni og skilvirkni sé gætt í rekstri stofnana og fyrirtækja í eigu ríkisins og hvort framlög ríkisins skili þeim árangri sem að er stefnt. Með þessu stuðlar Ríkisendurskoðun að gagnsæi, ábyrgð, trausti og trúverðugleika í opinberum rekstri og stjórnsýslu.

Stefnumarkmið 2025-2029

Skipulag vinnu Við stundum faglegt verkefnaval til að hafa sem mest áhrif Við erum liðsheild sem vinnur með skilvirkum hætti í teymisvinnu Við vinnum þvert á fagsvið þegar verkefni krefjast Við útvistum í okkar umboði endurskoðunarverkefnum sem henta til slíks Við skrásetjum alla verkferla okkar Við leggjum áherslu á upplýsandi og jákvæð innri og ytri samskipti
Verkefni og markmið Við stundum áhættumiðaða, virðisaukandi endurskoðun Við leggjum höfuðáherslu á endurskoðun ríkisreiknings og ríkisaðila sem skipta áreiðanleika ríkisreiknings mestu máli Við stuðlum að því að ríkisaðilar þrói innra eftirlit og endurskoðun Við vinnum virðisaukandi greiningar fyrir Alþingi um framkvæmd fjárlaga Við gerum stjórnsýsluúttektir til að hafa jákvæð áhrif og leiða til breytinga og framfara Við stuðlum að trausti gagnvart upplýsingum og gögnum um opinber fjármál og stjórnsýslu
Framþróun og tækni Við leggjum áherslu á rafræna þjónustu, stafræn skil og aukna sjálfvirkni Við notum leiðandi tæknibúnað og hugbúnaðarlausnir Við hagnýtum greiningartól og gervigreind með ábyrgum hætti Við stuðlum að því að stjórnvöld undirbúi sig sem best undir áskoranir er fylgja þróun og notkun gervigreindar Við mætum áskorunum sívaxandi streymis upplýsinga og gagna
Mannauður og starfsaðstæður Við erum leiðandi í jafnréttismálum Við leggjum áherslu á mannauð okkar, þjálfun, þekkingu og faglega uppbyggingu Við leggjum áherslu á vellíðan starfsfólks og menningu samstarfs og gagnkvæmrar virðingar Við bjóðum starfsfólki fyrirmyndar skrifstofuumhverfi Við mætum mismunandi þörfum starfsfólks um skil á milli vinnu og einkalífs með sveigjanleika í starfi Við erum samkeppnishæfur og eftirsóknarverður vinnustaður
Orðspor og ásýnd Við erum sjálfstæð og óháð í störfum okkar Við erum til fyrirmyndar í siðferði og ábyrgð Við veitum uppbyggilegt aðhald sem leiðir til framfara Við eflum traust og virðingu Alþingis, framkvæmdarvaldsins og almennings með störfum okkar

Skipurit

Ríkisendurskoðun starfar sem ein heild undir stjórn ríkisendurskoðanda. Fagleg starfsemi embættisins fer fram á tveimur sviðum: fjárhagsendurskoðunarsviði og stjórnsýslu- og lögfræðisviði. Fyrrnefnda sviðið annast fjárhagsendurskoðun samkvæmt 5. gr. laga nr. 46/2016 og tekjueftirlit samkvæmt 4. gr. sömu laga. Síðarnefnda sviðið annast stjórnsýsluendurskoðun samkvæmt 6. gr. laga nr. 46/2016, eftirlit með fjármálum stjórnmálastarfsemi samkvæmt lögum nr. 162/2006 og eftirlit með ársreikningum kirkjugarða samkvæmt lögum nr. 36/1993.

Yfir hvoru fagsviði er sviðsstjóri og undir honum eru sérfræðingar og, eftir atvikum, einn eða fleiri verkefnastjórar. Fagsviðin starfa almennt í teymum og eiga náið samstarf í ýmsum málefnum, bæði til lengri og skemmri tíma. Nokkur teymi starfa þvert á sviðin, s.s. teymi sem annast eftirlit með framkvæmd fjárlaga og laga um opinber fjármál og teymi sem sinnir málefnum tengdum innra eftirliti og innri endurskoðun hjá ríkisaðilum.

Stoðsvið sinnir ýmsum miðlægum verkefnum og stoðþjónustu, s.s. fjármálum og almennum rekstri embættisins, tölvu- og öryggismálum, og umsjón með fasteignum og tækjabúnaði embættisins. Þá sinnir skrifstofa ríkisendurskoðanda einnig miðlægum verkefnum, s.s. mannauðsmálum, samskipta- og upplýsingamálum og alþjóðlegri samvinnu.

Mannauður

Hér er listi yfir starfsfólk Ríkisendurskoðunar.

Embættið

Staða og hlutverk

Ríkisendurskoðandi

Stefnumótun 2025-2029

Stefnumarkmið 2025-2029

Skipurit

Mannauður

Jafnlaunavottun

Laus störf

Alþjóðleg samskipti

Ágrip af sögu embættisins

2022

2021

2018

2016

2008

1997

1995

1992

1987

1969

1955

1949

1943

1931

1917

1904

1879

1874