Ríkisendurskoðun telur ekki tilefni til að gera stjórnsýsluúttekt á starfsemi Lögreglunnar á höfuðborgarsvæðinu eins og sakir standa. Embættið mun á næstu árum áfram fylgjast með ákveðnum þáttum í starfsemi LRH og hefja úttekt ef ástæða þykir til.

Ríkisendurskoðun leggur þó til að Lögreglan á höfuðborgarsvæðinu líti til eftirfarandi atriða og geri viðeigandi úrbætur:

• Lögreglan á höfuðborgarsvæðinu þarf að huga sérstaklega að starfsaðstæðum og starfsánægju lögreglumanna. Mikilvægt er að stemma stigu við brotthvarfi úr stéttinni á sama tíma og ráðist er í nýráðningar.
• Rík ástæða er til að Lögreglan á höfuðborgarsvæðinu haldi áfram að þróa aðferðir til að mæla og fylgjast með málsmeðferðarhraða hjá embættinu. Mikilvægt er að lögreglan hafi yfirsýn um máls-meðferðarhraða, geti skoðað árangur með mælanlegum hætti og greint á hvaða sviðum þurfi að gera úrbætur. Þá er ástæða til að embættið skoði leiðir til að fylgjast með tölfræði um mál sem fyrnast meðan á málsmeðferð stendur.
• Lögreglan á höfuðborgarsvæðinu er hvött til að koma á innri endurskoðun í samræmi við 65. gr. laga um opinber fjármál og byggja upp viðeigandi þekkingu innan embættisins.